සිංහ කොඩිය | සිංහලේ | සිංහ ධජය.
ධජයක් කියන්නේ ලකුණක් නොවෙද සකී
ලකුණක ලකුණු කළ අදහස් යසට මැකී
කොඩියක් විචාරක ඇස කැත ඇසින් දකී;
සිංහයා තිරිසනෙක් බව නම් සැබෑවකී
(’නමුදු,) තිරිසන්කමට ඇදබානා මුසාවකී.
බැටළු-කොටළුවෙකු නොව කේසර රාජයෙකී
බෝසත් උතුමනුත් ඉපැදුණු අත්-භාවයකී
සුරු-විරු බලැති හද-තෙත් ලයැති එකී
එක් සුවිශේෂි සත් සතෙකුන් කීව හැකී.
සිංහ සෙය්‍යාව නොදන්න උගත්තු
සිංහ නාද නොහඳුනනා බලවත්තු
සිංහාවලෝකනය නොදනිති වියත්තු
සිංහ-වත සුනඛ-වත නොම දැනගත්තු
සිංහකොඩිය ගැන දොඩවත් ඒ පුත්තු.
“ගජකුම් බිඳින එකසර කෙසරිඳු බලැතී
කෙතරම් සා වුවත් තණකබල නොබුදිතී”
